Fresh News

ភ្នំពេញ: គណបក្ស​សិទ្ធិមនុស្ស កាលពី​ថ្ងៃទី​៧ ខែឧសភា ឆ្នាំ​២០១២ បានចេញ​សេចក្ដីថ្លែងការណ៍ រិះគន់​រដ្ឋាភិបាល​រប​ស់ស​ម្តេច​ហ៊ុន សែន ដោយ​លើកឡើងថា រាល់​ពេលមុន​បោះឆ្នោត ឬក៏​ពេលដែលមាន​ទស្សនកិច្ច​របស់​ថ្នាក់ដឹកនាំ​អន្តរជាតិ គឺ​រាជរដ្ឋាភិបាល ដែល​ដឹកនាំ​ដោយ​គណបក្ស​ប្រជាជន​កម្ពុជា តែងតែ​ចេញ​បទបញ្ជា​នេះ បញ្ជា​នោះ លើក​ផែនការ​សកម្មភាព​នេះ ផែនការ​សកម្មភាព​នោះ ធ្វើ​ហាក់ដូចជា​ខ្លួន​ចង់​ដោះស្រាយ​បញ្ហា​ទាំងនោះ​។ គណបក្ស​សិទ្ធិមនុស្ស បាន​ចោទ​ជា​សំណួរ​ថា តើ​ពេលណា​ទៅ ទើប​អ្នកដឹកនាំ​ជាតិ ឈប់​សម្ដែង​ឆាកល្ខោន ល្បែង​ថ្ពិន​ភ្នែក ដាក់​មហាជន​យើង​ទៀត​?

​ សេចក្ដីថ្លែងការណ៍ បានលើកឡើង​បន្តថា បញ្ជា​ថ្មី ទើបតែ​ចេញ ដោយ​ផ្អាក​ជា​បណ្ដោះអាសន្នលើ​សម្បទាន​ដី​សេដ្ឋកិច្ច ធ្វើឡើងនៅ​ចំពេលដែល​លោក Surya Subedi អ្នករាយការណ៍​ពិសេស​របស់​អង្គការសហប្រជាជាតិ មក​ស្វែងយល់​ពី​បញ្ហាដីធ្លី សម្បទាន​សេដ្ឋកិច្ច ដែល​ធ្វើ​ឲ្យ​ប៉ះពាល់​ដល់​ប្រជាពលរដ្ឋ ក៏ដូចជា​ជនជាតិភាគតិច​រាប់ម៉ឺន​គ្រួសារ​។
​យោងតាម​របាយការណ៍​របស់​ អង្គការក្រៅរដ្ឋាភិបាល​មួយ ​បាន​ឲ្យ​ដឹងថា រាជរដ្ឋាភិបាល​បានធ្វើ​សម្បទាន​សេដ្ឋកិច្ចឲ្យ​ក្រុមហ៊ុន​ប្រមាណ​ជា ២២៥ ក្រុមហ៊ុន កាន់កាប់​ផ្ទៃដី​ជាង ២ លាន​ហិកតា លើ​ផ្ទៃដី​សរុប​ប្រមាណ​ជា ៦ លាន​ហិកតា​។
​គណបក្ស​សិទ្ធិមនុស្ស លើកឡើងថា នេះ​សបញ្ជាក់​ឲ្យ​ឃើញថា ប្រជាពលរដ្ឋ​ជាង ១០ លាន​នាក់ កាន់កាប់​ដី​ប្រមាណ​ជាង ៣ លាន​ហិកតា ចំណែក​ក្រុមហ៊ុន និង​ឧកញ៉ា ចំនួន ២២៥ កាន់កាប់​ដី​ជិត ៣ លាន​ហិកតា​។​

​ សេចក្ដីថ្លែងការណ៍ បន្តទៀតថា ជាក់ស្ដែង ដូចជា​បញ្ហា​ព្រៃឈើ បានចេញ​បទបញ្ជា​ហាម​ដាច់ខាតមិន​ឲ្យ​មានការ​កាប់បំផ្លាញ​ព្រៃឈើ នៅពេលដែល​ជិត​អស់​ព្រៃ​ទៅហើយ ហើយ​ការកាប់បំផ្លាញ​ព្រៃឈើ​នៅតែមាន​។

​ គណបក្ស​សិទ្ធិមនុស្ស បាន​លើកឡើងថា យោងតាម​របាយការណ៍​របស់​អង្គការ​អន្តរជាតិ​មួយ បាន​ឲ្យ​ដឹងថា នៅ​ឆ្នាំ​១៩៦៩ ព្រៃឈើ​របស់​ខ្មែរ​មាន​ទំហំ ៧៣ ភាគរយ នៃ​ផ្ទៃដី​ទាំងមូល​របស់​ប្រទេស​យើង​។ នៅ​ឆ្នាំ​១៩៩៧ ព្រៃឈើ​នៅសល់តែ ៥៩ ភាគរយ ហើយ​នៅ​ឆ្នាំ​២០០៨ ព្រៃឈើ​ខ្មែរ​នៅសល់តែ ៣៥ ភាគរយ នៃ​ផ្ទៃដី​ទាំងមូល​របស់​ប្រទេស​យើង​តែប៉ុណ្ណោះ​។​

​ សេចក្ដីថ្លែងការណ៍​បន្ថែ​ម​ទៀតថា ចំណែក​បញ្ហា​មច្ឆ​ជាតិ មានការ​កាប់បំផ្លាញ​ព្រៃ​លិច​ទឹក ប្រើ​ឧបករណ៍​នេសាទ​ខុសច្បាប់ និង​ការនេសាទ​យ៉ាង​អនាធិបតេយ្យ​អស់​រយៈពេល​ជាច្រើន​ទសវត្សរ៍​មកហើយ ទើប​ចេញ​បញ្ជា​លេខ​០០១ ពាក់ព័ន្ធ​នឹង​បញ្ហា​នេះ នៅពេលដែល​ជិត​អស់​ត្រី​ពី​បឹង​ទន្លេសាប​ទៅហើយ​។ ប៉ុន្តែ​មជ្ឈដ្ឋាន​នានា​បាន​សង្កេតឃើញថា ការនេសាទ​បែប​អនាធិបតេយ្យ​នៅតែមាន​។​

​នៅ​សេចក្ដីថ្លែងការណ៍ ក៏បាន​ចោទ​ជា​សំណួរ​ថា ទាំង​ដី​សម្បទាន​សេដ្ឋកិច្ច ទាំង​ព្រៃឈើ ទាំង​មច្ឆជាតិ ស្ទើរតែ​ខ្ទេចខ្ទី​អស់​ទៅហើយ ពេលណា​ទៅទើប​អ្នកដឹកនាំ​ជាតិ​ឈប់​សម្ដែង​ឆាកល្ខោន ល្បែង​ថ្ពិន​ភ្នែក​ដាក់​មហាជន​យើង​ទៀត​?

​ពាក់ព័ន្ធ​នឹង​សេចក្ដីថ្លែងការណ៍​របស់​គណបក្ស​សិទ្ធិមនុស្ស​ខាងលើនេះ នៅ​មិនទាន់មាន​ប្រតិកម្មពី​មន្ត្រី​រដ្ឋាភិបាល​នៅឡើយ​ទេ​៕​