បញ្ចូលអត្ថបទ ៖ ស្រីណា កោះ
ថ្ងៃពុធ ទី៩ ខែឧសភា ឆ្នាំ២០១២ ម៉ោង ០៨:០០
កោះសន្តិភាព
ជនល្មើសត្រូវបានចាប់ខ្លួក្រុងប៉ោយប៉ែត ៖ ជនសង្ស័យប្រុស-ស្រីចំនួន២នាក់ ត្រូវកម្លាំងកងរាជអាវុធហត្ថក្រុងប៉ោយប៉ែតឃាត់ខ្លួនកាលពី វេលាម៉ោង៣រសៀល ថ្ងៃទី៦ ឧសភា នៅផ្ទះសំណាក់យីហោភ្នំពេជ្រ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ។
តាមការបំភ្លឺពីកងរាជអាវុធហត្ថក្រុង ឱ្យដឹងថា យោងតាមពាក្យបណ្តឹងពីបុរសរងគ្រោះឈ្មោះម៉ម ប៊ុនធឿន អាយុ៤៩ឆ្នាំ ជាអ្នករត់ម៉ូតូឌុប នៅភូមិអូរជ្រៅ សង្កាត់ប៉ោយប៉ែត ឱ្យដឹងថា រូបគាត់បាត់ម៉ូតូហុងដាឌ្រីម ធុនសេ១២៥ ស៊េរី២០០៩ មួយគ្រឿងកាលពីថ្ងៃទី២ ឧសភា ដោយមានស្ត្រីម្នាក់ជាអ្នកលួច ។ បន្ទាប់ពីទទួលបានបណ្តឹងរួចមក សមត្ថកិច្ចបានស្រាវជ្រាវ និងឈានទៅដល់ការឃាត់ខ្លួនស្ត្រីម្នាក់ឈ្មោះរ័ត្ន ពិសិដ្ឋ ហៅលីលី អាយុ៣៥ឆ្នាំ មានស្រុកកំណើតនៅខេត្តស្វាយរៀង និងយុវជនម្នាក់ទៀតឈ្មោះទួន កុសល អាយុ២៣ឆ្នាំ មានស្រុកកំណើតនៅខេត្តបាត់ដំបង បច្ចុប្បន្នពួកគេទាំង២នាក់ស្នាក់នៅក្នុងភូមិកើតហេតុខាងលើ ។ លុះពេលឆែកឆេរពួកគេ សមត្ថកិច្ចរកឃើញថ្នាំញៀនប្រភេទម៉ាទឹកកកចំនួន៦ថង់តូច និងឧបករណ៍សម្រាប់ប្រើប្រាស់មួយចំនួនថែមទៀតផង ។
មន្ត្រីកងរាជអាវុធហត្ថឱ្យដឹងថា ស្រ្តីសង្ស័យឈ្មោះរ័ត្ន ពិសិដ្ឋ ហៅលីលី អាយុ៣៥ឆ្នាំ បានឆ្លើយសារភាពថា ខ្លួនពិតជាបានលួចម៉ូតូរបស់គេមែន ពេលលួចបានខ្លួនយកទៅលក់នៅឯទីរួមខេត្តបន្ទាយមានជ័យ ក្នុងតម្លៃ១.១០០ដុល្លារអាមេរិក ប៉ុន្តែប្រាក់ទាំងអស់នេះខ្លួនយកទៅលេងល្បែងចាញ់អស់ហើយ ។ រីឯថ្នាំញៀនប្រភេទម៉ាទឹកកកទាំងអស់ដែលមាននៅក្នុងខ្លួនគឺខ្លួន បានទិញពីយុវជនខាងលើ ដើម្បីយកទៅលក់បន្តទៀត ។
លោកវរសេនីយ៍ត្រី ហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែតឱ្យដឹងថា ចំពោះជនសង្ស័យប្រុសស្រីទាំង២នាក់ ដែលកម្លាំងរបស់លោកបានឃាត់ខ្លួនរួមជាមួយវត្ថុតាង សមត្ថកិច្ចជំនាញរបស់លោកក្រោយពេលសួរនាំ បានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ ៕
0 comments To "លួចម៉ូតូគេយកទៅលក់ ពេលសមត្ថកិច្ចឃាត់ខ្លួនឃើញម៉ាទឹកកក5ថង់"
Post a Comment