រាជធានីភ្នំពេញ ៖ លោកអឿន សុខា ហៅនាយហុងដា ក្នុងវ័យ៤០ឆ្នាំ បានបង្ហាញមុខជាថ្មីជាមួយក្រុមនាយកុយ នៅស្ថានីយទូរទស្សន៍ CTN និងបាយ័ន ក្រោយពីបាត់មុខជាច្រើនសប្តាហ៍កន្លងមក ។ តារាកំប្លែងរូបនេះអតីតជាអ្នកសិល្បៈល្ខោនបាសាក់តវង្សត្រកូល តាំងពីជីតាមក ។ នាយបានចូលប្រឡូកក្នុងវិស័យសិល្បៈតាំងពីឆ្នាំ១៩៧៩ ដែលកាលនោះជីតារបស់នាយជាតួយក្ស ឪពុក និងម្តាយជាតួឯក ក្នុងក្រុមល្ខោនបាសាក់បាក់ស្រេងព្រួញមាស ។
(កោះសន្តិភាព លោកអឿន សុខា ហៅនាយហុងដា)
ក្រោយមកនៅឆ្នាំ២០០០ នាយហុងដា បានចូលប្រឡូកក្នុងវិស័យសិល្បៈចម្រៀងសម័យ និងសម្តែង ។ នៅពេលនាយ បានចូលរួមសម្តែងកំប្លែងជាមួយក្រុមនាយកុយក្នុងអំឡុងឆ្នាំ ២០០៧-២០០៨ នាយក៏មានភាពលេចធ្លោទទួលការគាំទ្រពីប្រិយមិត្តទស្សនិកជនរហូត ទទួលកេរ្តិ៍ឈ្មោះល្បី ។ នាយហុងដា ជួបប្រទះរឿងរ៉ាវស្នេហាបែកបាក់ជាមួយប្រពន្ធ គឺនាងរ៉េន សុធារី ហៅនាងឃ្មឹប កាលពីឆ្នាំ២០១០ ។
មួយរយៈពេលចុងក្រោយនេះ នាយហុងដា បានបាត់មុខមិនដែលឃើញចូលរួមសម្តែងកំប្លែងជាមួយក្រុមនាយកុយ ទេ ទើបតែបង្ហាញមុខជាថ្មីកាលពីថ្ងៃទី៥និង៦ ឧសភា ឆ្នាំ២០១២ នៅក្នុងកម្មវិធីមន្តស្នេហ៍សំនៀងនៃស្ថានីយទូរទស្សន៍ CTN និងក្នុងកម្មវិធីប្រជុំតារានៃស្ថានីយទូរទស្សន៍បាយ័ន ។ ជួបជាមួយអ្នកយកព័ត៌មានកោះសន្តិភាព នាយហុងដា ប្រាប់ថា នាយបានចាកចេញទៅច្រៀង និងសម្តែងកំប្លែងជាមួយសិល្បករ សិល្បការិនី គឺលោកឡាយ វណ្ណៈ អ្នកនាងពេជ្រ សុជាតិ អ្នកនាងឆោម ចាន់ណេត និងតារាចម្រៀងមួយចំនួនទៀតនៅប្រទេសអូស្ត្រាលីតាំងពីថ្ងៃទី២៣ មីនា ឆ្នាំ២០១២ រហូតមកដល់ថ្ងៃទី១ ឧសភា ឆ្នាំ២០១២ ទើបត្រឡប់មកដល់មាតុប្រទេសវិញ ។
ក្រោយពីបែកបាក់គ្នាជាមួយប្របន្ធ ពេលនេះនាយហុងដា មានស្នេហាថ្មីទៀតហើយ ប៉ុន្តែមិនទាន់រៀបការទេ ។ នាយ បញ្ជាក់ថា ប្រពន្ធក្រោយរបស់នាយឈ្មោះម៉ុច មិនមែន អ្នកលិស្បៈទេ ។ ពេលសួរថា តើពេលណានាយរៀបការ? នាយហុងដា ឆ្លើយថា មិនទាន់កំណត់ទេថាត្រូវរៀបការពេលណា ។
នាយហុងដា សព្វថ្ងៃក្រៅពីសម្តែងកំប្លែងជាមួយក្រុមនាយកុយនៅលើឆាកតាម ស្ថានីយទូរទស្សន៍នានា និងនៅតាមបណ្តាខេត្ត-ក្រុងនានា នាយក៏ច្រៀងនៅក្នុងភោជនីយដ្ឋានបឹងមាសរាល់រាត្រី ព្រមទាំងច្រៀងកាត់សក់ក្នុងពិធីមង្គលការ ជាមួយនាងកាតុ និងនាងប្រិមប្រិយ ។ លើសពីនេះទៀតនាយហុងដា បានបង្កើតមុខរបរលក់កាហ្វេដោយដាក់យីហោកាហ្វេហុងដា៕
0 comments To "នាយហុងដា បង្ហាញមុខជាថ្មីក្នុងក្រុមនាយកុយ"
Post a Comment