Fresh News

ភ្នំពេញ​: ​ក្រុម​ជើងឯក League​ របស់​ប្រទេស​នេ​ប៉ាល់ Nepal Police Club បាន​យកឈ្នះ​ក្រុម​ជើងឯក​ League របស់​ប៊ូ​តាន Yeedzin FC ៤​ ទល់ ០​ មុនពេល​ក្រុមទាំងពីរ ត្រូវវេ​ច​បង្វិ​ច​​ត្រឡប់​ទៅ​ផ្ទះ​វិញ នៅក្នុងព្រឹត្តិការណ៍​បាល់ទាត់ AFC President-Cup 2012។​ ចំណែកក្រុមបាល់ទាត់ ភ្នំពេញក្រោន ដែលជាជើងឯក League របស់កម្ពុជា បានឆ្លង​ផុត​វគ្គជម្រុះ ឈានទៅលេងនៅវគ្គបន្ត។

​ គ្រាន់តែ​លេង​បាន ២ ​នាទី ក្នុងការប្រកួត កាលពីរសៀលថ្ងៃទី៩ ខែឧសភា ឆ្នាំ២០១២ នៅស្តាតអូឡាំពិក ក្នុងរាជធានីភ្នំពេញ ​លេខ ​១៧ ​របស់ ​Nepal Police Club ឈ្មោះ​Bhola ​រកបាន​មួយ​គ្រាប់​ ឲ្យ​ក្រុម​មុនគេ។ ចំណែកនៅនាទី ​៣៦ ​លេខ​១៤​ ឈ្មោះ​Yogesh រកបាន​មួយ​គ្រាប់ ​ឲ្យ​ក្រុម ដែល​ជាហេតុ​ធ្វើ​ឲ្យ​ចប់​តង់​ទី ១​ ក្រុម​ Nepal Police Club ​នាំមុខ Yeedzin FC ២ ទល់ ០ ។​

​ចូលដល់ដើមតង់​ទី​២ ខ្សែការពា​រលេខ ៧​ របស់​នេ​ប៉ាល់ ​ឈ្មោះ​ Parbat ​រកបាន​មួយ​គ្រាប់ ​ឲ្យ​ក្រុម​ដែរ។ ​មកដល់​នាទី​៧០ ​លេខ​១៧ ​ឈ្មោះ ​Bhola ​រកបាន​មួយ​គ្រាប់​ឲ្យ​ក្រុម​​បន្ថែមទៀត ​ធ្វើ​ឲ្យ​ចប់​ការប្រកួត​ ក្រុម ​Nepal Police Club ​ឈ្នះ​ក្រុម Yeedzin FC ៤ ​ទល់ ០​។​

យ៉ាងណាក៏ដោយ ក្រុម​ទាំង ២ ​នេះ ​ត្រូវហាលអាវ​ដូចគ្នា ហើយ​ត្រូវ​វិលត្រឡប់​ទៅ​ផ្ទះ​វិញ​ ដោយ​គ្មាន​សំណាង​លេង​វគ្គ​បន្ត​ឡើយ។​

ដោយឡែក ​ការប្រកួត​រវាង​ក្រុម​ភ្នំពេញ​ក្រោ​ន ជើងឯក League របស់កម្ពុជា ​ជាមួយ​ក្រុម​ជើងឯក League របស់​គៀរ​ហ្ស៊ី​ស្ថាន ​គឺ​ក្រុម ​Dordoi បានចាប់​ផ្ដើ​មប្រ​កួត ​ជាមួយ​នឹង​​ភ្លៀង​ធ្លាក់​យ៉ាងខ្លាំង នៅរសៀលថ្ងៃទី៩ ខែឧសភា ឆ្នាំ២០១២ នៅស្តាតអូឡាំពិក ក្នុងរាជធានីភ្នំពេញ។​

​ទោះបី​ យ៉ាងនេះ​ ក៏ដោយ​ ក៏​ការប្រកួត​នៅតែ​ដំណើរការ​ តែ​បន្ទាប់ពី​លេង​បាន​ ១៧ ​នាទី ​ទឹកភ្លៀង​បាន​លិច​ទីលានបាល់ទាត់ស្តាតអូឡាំពិក​យ៉ាងខ្លាំង។ ​ស្ថានភាព​បែប​នេះ​ អាជ្ញាកណ្ដាល​ ដែលជា​ជនជាតិ​សឹង្ហ​បូរី ​Sukhbin Singh បាន​ផ្អាក​ការ​ប្រកួត​ដោយ​ហៅ​ជំនួយការ​អាជ្ញាកណ្ដាល​ទាំង​២ ដែល​ម្នាក់​ជា​ជនជាតិ​ថៃ និងម្នាក់ទៀត​ជន​ជាតិ​ហុងកុង មន្ត្រី​ទី៤ ជា​ជនជាតិ​ម៉ាឡេស៊ី​ ព្រមទាំង​ប្រធាន​ក្រុម​ទាំង២ ​មក​ពិភាក្សាគ្នា​បន្ទាប់មក​ ការប្រកួត​បាន​ត្រូវ​ផ្អាក​រយៈពេល​ ៣០ នាទី ​រង់ចាំ​ឲ្យ​ទឹក​លើ​ទីលាន​ហូរ​អស់សិន។​

​បន្ទាប់​ផ្អាក​ ៣០ ​នាទី ការប្រកួត​បាន​បន្ ត​ទោះបី​ទឹក​លើ​ទីលាន​ស្រក​ មិនទាន់​អស់​ក៏​ដោយ។ ​ស្ថានភាព​ នៃ​ការប្រកួត​ គឺក្រុម​ទាំង ២ មិនមាន​កលល្បិច​អ្វី​លេង​ឡើយ​ ដោយ​សារតែ​ទឹក​រំខាន។ ការទា​ត់បាល់​បំ​ផ្លោង​ពី​ចម្ងាយ ​គឺជា​ជម្រើស​ដ៏​ល្អ​តែមួយគត់​របស់​ក្រុម​ទាំង ២ នេះ។​

​មកដល់​តង់​ ទី២ Dordoi ​ព្យាយាម​ស៊ុត​បាល់​ពី​ចម្ងាយ​ច្រើន ​ដោយសារតែ​គេ​មិនអាច​អូស​​បាល់​ចូល​ទៅ​កៀក​ទី​បាន។ ក្រុម​ភ្នំពេញ​ក្រោ​ន ​ក៏​ព្យាយាម​លេង​បាល់​ពី​ចម្ងាយ​ដែរ​ តែ​មិនបាន​ផល។​

រហូតដល់​ចុង​ ម៉ោង​ទៅហើយ​ គឺ​នាទី ​៨៧ ​ភ័ក្តិ រ៉ា​ឌី ​លេខ​១៣​ របស់​ភ្នំពេញ​ក្រោ​ន​ មាន​កំហុស​ នៅក្នុង​តំបន់​ប៉េ​ណា​ល់​ទី​ ធ្វើ​ឲ្យ​អាជ្ញាកណ្ដាល​ សម្រេច​ពិន័យ​ប៉េ​ណា​ល់​ទី។

លេខ ៩ របស់​ Dordoi​ ឈ្មោះ​ Baimatov Azamat ទាត់​បាល់​ពិន័យ​នោះ​ បញ្ចូល​ទី​បានសម្រេច។​

​ ចប់​ការប្រកួត Dorsoi ឈ្នះ​ភ្នំពេញ​ក្រោ​ន ១ ទល់ ០ ។ ប៉ុន្តែក្រុម​ទាំង ២​ បាន​ឡើង ទៅ​​លេង​​វគ្គ​បន្តទៀត ​ដោយ Dordoi ជា​ក្រុម​លេខ ១ ឯភ្នំពេញ​ក្រោ​ន ជា​ក្រុម​លេខ ២ ក្នុង​ពូល B។​
​ ​
​គួរបញ្ជាក់​ថា ចាប់​ពី​ថ្ងៃទី៥ ដល់ទី៩ ខែឧសភា ឆ្នាំ២០១២ ​កម្ពុជាបាន​ធ្វើជា​ម្ចាស់ផ្ទះ​ នៃ​ការប្រកួត​ជម្រុះក្នុងពូល B នៃក្របខ័ណ្ឌបាល់ទាត់​ President-Cup ឆ្នាំ២០១២។ ​ក្រុម​ជើងឯកបាល់ទាត់​ League ឆ្នាំ២០១១ មកពីប្រទេសចំនួន ៤ ​នៅពូល B គឺ ទី១-​ភ្នំពេញ​ក្រោន ​ជើងឯក League ​របស់​កម្ពុជា។ ទី២-ក្រុម ​Nepal Police Club ដែល​ជា​ជើងឯក League របស់​នេ​ប៉ាល់។ ទី៣-ក្រុម Yeddzin ជា​ក្រុម​ជើងឯក ​League​ មកពី​ប្រទេស​ប៊ូតាន និង​ទី៤-ក្រុម Dordoi ជា​ក្រុម​ជើងឯក League ​មកពីគៀ​ហ្ស៊ី​ស្ថាន។​

ការប្រកួតបាល់ទាត់ ពានរង្វាន់ទ្វីបអាស៊ី AFC President-Cup ឆ្នាំ២០១២
ការប្រកួតបាល់ទាត់ពានរង្វាន់ទ្វីបអាស៊ី AFC President-Cup ឆ្នាំ២០១២ ចូលរួម​ដោយ​ក្រុម​បាល់​​ទាត់ចំនួន ១២ ក្រុម ដែលសុទ្ធតែជាជើងឯកពានរង្វាន់ League ក្នុងប្រទេស​ចំនួន ១២ ក្នុងទ្វីបអាស៊ី ចែកជា ៣ ពូល គឺ ពូល A ពូល B និងពូល C។ ក្នុងមួយ​ពូល មាន ៤ ក្រុម។

ការប្រកួតក្នុងវគ្គជម្រុះ ​តាម​ពូលនិមួយៗ ចាប់ពីថ្ងៃទី៣ ដល់ថ្ងៃទី១៣ ខែឧសភា ឆ្នាំ២០១២។ កម្ពុជា ធ្វើជាម្ចាស់ផ្ទះ ប្រកួតជម្រុះក្នុងពូល B។

ចំណែកការប្រកួត នៅវគ្គផ្តាច់ព្រ័ត្រ នឹងធ្វើឡើងចាប់ពីថ្ងៃទី២៤ ដល់ថ្ងៃទី៣០ ខែកញ្ញា ឆ្នាំ២០១២។

ក្រុមបាល់ទាត់ទាំង ១២ ដែលបានចូលរួមប្រកួតព្រឹត្តិការណ៍បាល់ទាត់ ពានរង្វាន់​ទ្វីបអាស៊ី AFC President-Cup ឆ្នាំ២០១២ រួមមាន៖

១-ក្រុមបាល់ទាត់ Sheikh Jamal របស់ប្រទេស Bangladesh
២-ក្រុមបាល់ទាត់ Yeedzin របស់ប្រទេស Bhutan
៣-ក្រុមបាល់ទាត់ Phnom Penh Crown របស់ប្រទេសកម្ពុជា
៤-ក្រុមបាល់ទាត់ Taiwan Power Company របស់ចិនតៃប៉ិ Chinese Taipei
៥-ក្រុមបាល់ទាត់ Dordoi Bishkek របស់ប្រទេស Kyrgyzstan
៦-ក្រុមបាល់ទាត់ Erchim របស់ប្រទេស Mongolia
៧-ក្រុមបាល់ទាត់ Nepal Police Club របស់ប្រទេស នេប៉ាល់
៨-ក្រុមបាល់ទាត់ KRL របស់ប្រទេស Pakistan
៩-ក្រុមបាល់ទាត់ Markaz Shabab Al-Am'ari របស់ប្រទេស Palestine
១០-ក្រុមបាល់ទាត់ Ratnam របស់ប្រទេស Sri Lanka
១១-ក្រុមបាល់ទាត់ Istiqlol របស់ប្រទេស Tajikistan
១២-ក្រុមបាល់ទាត់ Balkan របស់ប្រទេស Turkmenistan

ពូល A៖
១-ក្រុមបាល់ទាត់ KRL របស់ប្រទេស Pakistan
២-ក្រុមបាល់ទាត់ Erchim របស់ប្រទេស Mongolia
៣-ក្រុមបាល់ទាត់ Taiwan Power Company របស់ Chinese Taipei
៤-ក្រុមបាល់ទាត់ Sheikh Jamal របស់ប្រទេស Bangladesh

ពូល B៖
១-ក្រុមបាល់ទាត់ Phnom Penh Crown របស់ប្រទេសកម្ពុជា
២-ក្រុមបាល់ទាត់ Dordoi Bishkek របស់ប្រទេស Kyrgyzstan
៣-ក្រុមបាល់ទាត់ Yeedzin របស់ប្រទេស Bhutan
៤-ក្រុមបាល់ទាត់ Nepal Police Club របស់ប្រទេស នេប៉ាល់

ពូល C៖
១-ក្រុមបាល់ទាត់ Istiqlol របស់ប្រទេស Tajikistan
២-ក្រុមបាល់ទាត់ Markaz Shabab Al-Am'ari របស់ប្រទេស Palestine
៣-ក្រុមបាល់ទាត់ Balkan របស់ប្រទេស Turkmenistan
៤-ក្រុមបាល់ទាត់ Ratnam របស់ប្រទេស Sri Lanka